"पत्नी ऐं डबल बेड / पोपटी हीरानन्दाणी" के अवतरणों में अंतर

चालाकु सियासतदान हुजे
या जाहिल ॻोठाणो,
उदास थिए या बोद में अचेहज़ार हाराए या ॻखल खटी अचे
बिज़नेस में नुक़्सानु पवेसि
या अचानक लखनि जो फ़ाइदो
तन्दुरुस्त ऐं ताक़तवर हुजे
या बीमार ऐं निसतो
जंगि जो जश्नु मल्हाए
या सुलह जे काग़ज़ ते सही पाए
मन ऐं तन जे मुख़्तलिफ़ हालतुनि में
हू डबलबेड जी पनाह में अचे थो
डबल बेड-
जंहिं अॼु मुंहिंजे शरीर खे
बेपनाह करे छॾियो आहे!
मुंहिंजो शरीरु
जंहिं खे हुन
लोपस, टैबलेट्स,
आपरेशन या अहिड़ियुनि किनि तजवीजु़नि
हवाले करे छॾियो आहे

अॻे
ससु जी मोकल
दुछती या माड़ी
खीर जो गिलासु या ओताक़
शुभु ॾींहुं
ॿालक जो जन्मु
पेकनि में टिकणु
घर में बुजु़र्गनि जो हुजणु
या अहिड़ोई कुझु ॿियो
सभु गॾिजी
मुंहिंजे शरीर जी रक्षा कन्दा हुआ,
पर हाणि
विज्ञान जी तरक़्क़ी
माइटनि खां अलॻ रहणु
विज्ञान जी तरक़्क़ी
लज़्ज़त खे
ज़िंदगीअ जो मक़्सदु समुझण
ऐं इहो डबल बेड
सभु गॾिजी
मुंहिंजें शरीर खे
सिर्फ़ माणण जी
चीज़ बणाए छॾीनि था

ॿियो को हथु बि खणी लाए
त ॿिया शोरु मचाईनि
ऐं मां बि वाका करियां
पर हिन पंहिंजे लाइ छा चवां?
हुन लाइ त
डबल बेड पे कसरत ई
सभु कुझु आहे,
पोइ मुंहिंजी छा मजाल
जो चई सघांइ
त
इहो प्यारु नाहे!

(ज़हरु ऐं इनसानु-1998)