"खालु / लछमण भाटिया 'कोमल'" के अवतरणों में अंतर

सभेई नज़रूं
आसमान में अटिकियल आहिनि
नज़रुनि अॻियां उजालो
आहि उजाले जे चौधारी
ख़ालु ई ख़ालु-
ख़ालु जिस्म जे अंग अंग खे
छुहन्दो-गुनहगार कन्दो
ख़ालु अन्दर हिक नएं ख़ाल ॾांहुं
धिके रहियो आ।
रोशनी जिस्म सॼे खे उघन्दी
वधीक मेरो कन्दी वञे थी।
लहरूं पाणीअ जे गहराईअ में ई
गहिरियूं बुडी वेयूं।
पथर टाकीन्दड़ छेणियूं पिणि
मुॾियूं थी वेयूं।
नसूं उमेदुनि जूं
सभु ॿाहिरि निकिरी आयूं।
कंंिह जो ख़ून वहायो तन में?
मुर्दा घरु-शमशान, इस्पतालूं ऐं क़बरूं
ऊंदाहनि रस्तनि ते निकिरी आया आहिनि
रोशनी तारनि जूं ज़हरीलियूं अखियूं उन्हनि खे
पंहिंजी दहशत में ई-
जकिड़े बीठियूं आहिनि।
रोगु ऐं रोॻी
हिक ॿिए जे ई कढ लॻा आहिनि
मर्ज़ु इलाजु में जिस्मु सभिनी जो साॻियो आहे
ट्रैफ़िक़ जे हिन गोड़ शोर में
रगूं बि रस्तनि वांगुरु
डिंगियूं फिॾियूं हलनि थियूं
ॾामर जो कारो रस्तो
कंहिं पोढ़ी-कोढ़ी वेश्या वांगुरु
वरी नऐं सिर घूंघटुपाए ॿाहिर ईन्दो
धूड़ि अखियुनि में एॾी भरिजी वेई आहे-
ॼणु भासे थो, सुबूह अञा जाॻियो ई नाहे।