"काल जा ॿ लाश / हरीश वासवाणी" के अवतरणों में अंतर

कंहिं खे ख़बर कान हुई
शहर में
सुकल गाह जो हिकु झंगलु बि आहे
कंहिं तसव्वुरी ताण में
कंडनि जहिडा उन जा कख काना
पाण में गसण लॻा
ओचितो
उन्हनि मां बाहि जी हिक चिणिंग पैदा थी
सॼो शहरु
झंगली बाहि जी लपेट में हो
तपिश एतिरी वधी वेई
जो हवा जो साहु खणणु मुश्किल थी पियो।
उन जलन में
हवा जो जीअं ई दमु टुटो
उन जे विंजोॻ में
आग बि निर्जीव थी वेई
शहर जे रस्ते ते
कारंहि जहिड़ा
काल जा ॿ लाश पिया हुआ
ॿई इनसान नुमा थे लॻा
हिक लाश खे खणी
हू शमशानभूमीअ ते पहुता
पर उन जो क्रियाकर्मु करे न सघिया।
उहो लाशु हवा जो हो
उन्हनि जे हथनि में ई नथे आयो
ॿियो लाश खणी हू कब्रिस्तान में पहुता
पर उन खे दफ़नए न सघिया
उहो आगि जो लाशु हो
जो हर कोशिश जे बावजूद
उते ई उभो थी थे बीठो।
कंहिं रोशनीअ में
हू लाशनि खे सुञाणीं बि नथे सघिया
ऐं ॿिन्ही खे गॾु बि रखी नथे सघिया
उन्हनि खे डपु हो
वरी न का गै़बी चिणिंग पैदा थी वञे
पोइ त हू
रोशनीअ खे बि सुञाणी न सघन्दा।
(शहरु वरी झंगली बाहि जे पेट में हून्दो)