"जंगि जो अहसासु / वेढ़ो 'रफ़ीक़'" के अवतरणों में अंतर

बालकनीअ में आराम कुरिसीअ ते
वेठे वेठे
विजुनि जा दिल ॾहिकाईन्दड़ धमाका बुधन्दे,
अॾोल पत्थर जीआं आराम कुरिसीअ ते
पइजी रहियो आहियां
नज़रूं आसमान तरफ़ खुतल अथमि
मुंहिंजो ज़हनु
चंचल ॿालक जीआं डोड़न्दे डोड़न्दे
माज़ीअ जो दरु खुड़काए थो!
माज़ीअ में खोहियल जुवानीअ खे
ॻोल्हे रहियो आहियां!!
भरपूर जवानीअ में लड़ाई लड़न्दे
ट।ग कपाए, जंगि जे मैदान तां
वापस आयुसि-सोचियुमि
जंगि जे मैदान तां वापस त आयुसि,
लेकिन ज़िन्दगीअ जी हीअ जंगि?
हा, हीअ जंगि काठ जे घोड़ीअ
जे सहारे लड़िणी पवन्दी...
हिक नईं जंगि!!
तव्हीं चवन्दा-ख़ुश क़िस्मत आहियां

बची त वियुसि, सलामत तं आहियां।
मां सोचियां थो-
हीउ जीअणु बि को जीअणु आहे!
मुंहिंजे अन्दर जो दर्दु पुछिणो अथव
पुछी ॾिसो मुंहिंजे कुल्हनि खां,
काठ जे घोड़ीअ खां!
जंगि जे वहशानियत तो
कहिड़ो अहसासु अव्हां खे?
मुल्की बाशिंदनि जे शतरंज जा प्यादा!
ॿियनि लाइ लड़णु
पंहिंजे लाइ जीअणु बि नसीब किथे?
तव्हां खे बि ॼाण आहे
जवाननि जे ख़ून जे नदियुनि ते ई
सुलह ऐं अमन जी पुल ॿधिबी आ
पुल जे ॿिए पार
बाशिंदनि जे महफ़िलुनि में
वाह! वाह! वाह!
ओ मुल्की वाशिंदा
असांजे कुल्हनि ते बन्दूकूं रखी
धमाका कराइण वारा,
अमर ऐं भाईचारे जा होका ॾियण वारा
ओ शतरंज जा खेॾारी
अव्हां खे जंगि जो कहिड़ो अहसासु?

जंगि छा
मौतु छा,
मरी मरी वरी जीअणु छा?
अव्हां हर युग, हर काल में
बलग़ारी नारनि जा बिगुल ई त
वॼाया आहिनि,
अमन जे पुठीअ में छुरा हणी
सुर्ग जहिड़ी सुन्दर भूंइ खे
टुकिरनि में विरहाए
अव्हां ई फ़र्कु बणायो आ।