"जलावतनी / गोप कमल" के अवतरणों में अंतर

ट्रकुनि जी क़तार
धीरे धीरे
रुकिजी रुकिजी वधन्दड़
अन्दर सथियल माण्हू
माण्हुनि जे विच में
चीभाटिजन्दडु मां
बाबा चवे पियो शहर था हलूं
शहर!
केतिरा भेरा ज़िदु कयो हूंदुमि

बाबा शहरु ॾेखारियो
बाबा शहरु ॾेखारियो
चवनि था शहर में
वॾियूं वॾियूं जॻहिंयूं
मोटरूं ऐं बसूं पिणि।
ट्रक में विहारण खां अगु
केॾो पन्धु करायाईं!
ॾाढो थकिजी पियुसि
नेठि बाबा हंज खंयो।
ॻोठ मां निकिरण वक़्ति
अमां जे अखियुनि में ॻोढ़ा हुआ
बाबा जूं अखियूं ख़ाली ख़ाली!
पट तां मिटी खणी
निरिड़ ते लॻायाईं
चवे पियो:
हीअ पंहिंजी धरती आहे
हीउ पंहिंजो मुल्कु आहे
पंहिंजी धरती?
ऐं पंहिंजो मुल्कु
छा थीन्दो आहे?
पासे में मुछुनि वारो भाई
नासी कपड़नि में
बन्दूक झले वेठो आहे।

हथु लॻायां? मतां मारे न!
त्रिपाल जे टुंग मां ॿाहिर ॾिसां थो
बाहियूं ई बाहियूं!
रखी रखी फटाकनि जी ठा ठा
के माण्हू रस्ते ते
सुम्हिया पिया आहिनि
ॻाढ़ो रंगु मखे!
हीउ कहिड़ो शहरु आहे?
हिते त होली ऐं ॾियारी
गडु पिया मल्हाईनि।
बाबा, घरि कॾहिं हलन्दासीं?
न, मूं खे शहरु
न ॾिसिणो आहे।
घरि वापस हलु
बाबा
घरि वापस हलु!

(वापसी - मजमूओ, 1999)