"अरमान अथमि / हरूमल सदारंगाणी ‘ख़ादिम’" के अवतरणों में अंतर

लिङ-लिङ में सूर
हॾ-हॾ पुणि चूर
तन में
तप खां
खूरो थे ॿरियो
अखिड़ियुनि मां
आतिश जा शोला निकता...

मां
दफ़्तर खां मोटी
अची
खट ते पियुसि।

खुश्कीअ सां गॾु बुख़ार
बेहाली ऐं तास
हर हर पाणी
किंझणु
कुरिकणु
छा छा विफलणु!
”बाबा लोली न ॾे
अञा ॾींहुं आहे

आखाणी
रात जो ॿुधाइजि“...
हर हर थे अची
मुंहिंजी ॿचिड़ीअ
नाजु़क
नंढिड़ा
हथिड़ा खणी
मूंखे चिंबड़ी
भाकियूं पातियूं।

के ॻोढ़ा
ॿरंदड़ अखिड़ियुनि मां
टपकी
झट में
हुनजी नाजुक ॿांहं ते किरिया
समझी वेई
हालत मुंहिंजी
ठीक नआहे
टिप ॾेई
भरि में वेही
वेढ़े वेई
ऐं पंहिंजनि नरम
नंढिड़नि
हथिड़नि सां

हल्की
मिठिड़ी
लोली ॾिनईं
लोली ॾेई
लेटी पेई।

मूं सारी रात
सुबह ताईं
तप भोॻियो
आराम न आयुमि।

अफ़्सोस
मगर अरमान अथमि
ॿचिड़ीअ खे
हर रात जियां
लोली न ॾिनियमि
कुझ कीन सुणायुमि।