ज़हमत / अर्जुन मीरचंदाणी 'शाद'
पंहिंजी नंढिड़ी दुनिया खां ॿाहिर निकिरी
सॼी ख़यालात खे
सृष्टीअ जी विशालता सां
हम आग़ोश करे छॾि
इनसान ते
फ़ेलसूफ़नि जी ज़हमत!
‘एयर कंडीशंड’
बंगुलनि मां
पहरेदारनि जे परियां बीही
अवाम खे उभारणु:
‘वतन तां सिरु घोरे छॾि’-
इनसान ते
सियासतदाननि जी ज़हमत!
दुखु सुखु ईश्वर जी माया आहे
जहिड़ो जंहिंजो मुक़दरु
रज़ा ते राज़ी रहो
निंड में सुम्हारे छॾण जी तरतीब-
इनसान ते
धर्म जे रखवारनि जी ज़हमत
औरत
आत्मिक उन्नतीअ जी राह में
रुकावट आहे।
हुन जे जिस्म जो तसव्वुर बि न करि-
इनसान ते
योगियुनि ऐं तपस्वियुनि जी ज़हमत!
मुंहिंजो ‘मां’
कंडनि जे ढेर अन्दर दॿियलु
हर पहलूअ जो
ज़रो ज़रो ज़ख़मियलु
चिचिड़जी वियल
कंडा आशकार आहिनि
मुंहिंजो ‘मां’ गु आहे;
मुंहिंजी नंढिड़ी दुनिया,
मुंहिंजो घरु
वसीह दुनिया सां
विशाल आत्मा सां
कुशादी क़ौमियत
ऐं
सर्व समाज सां
हम-माना थी वियो आहे;
मां
पंहिंजी ‘मां’
ऐं पंहिंजे घर खे
ऊंदाहियुनि जे अमीक़ अन्दर
थाफोड़ा हणी
ॻोल्हे रहियो आहियां!
किथे आहे मुंहिंजो ‘मां’?
मुंहिंजो नंढिड़ो प्यारो घरु
‘विशालता’ खां वॾो
जंहिं अॻियां
मुंहिंजे लाइ
दुनिया जो तसव्वुरु
हिक ॿुड़ीअ मिसल आहे!
