निन्ड / अर्जुन ‘शाद’
1.
थकिजी-टुटिजी मां लही कम तां थो ‘बी.टी.’ ते अचां
थो नएं थक जे लइ अज़खु़द वरी तयार थियां
ख़ुश नसीबीअ सां मिली सीट अथमि गाॾीअ में
वक़्त खे ख़त्म करण लाइ को नाबिल थो कढां
दिल मंे मायूसी ई मायूसी मगर रहिजियो वञे
कीन महबूब जी पुणि याद थकावट खे भञे!
2.
नीले आकास मां, खेतनि मां का राहत न मिली
कंहिं हसीन नारि जे ख़यालनि मां का फ़र्हत न मिली
पंहिंजी ई जान मां थी अहिड़ो मां बेजार वियुसि
मुंहिंजे बेकै़फ घड़ियुनि खे किथां रंगति न मिली
चैन ॻोलियुम थे मगर वियो सो मिली खोज बिना
पंहिंजे नेणनि जे अन्दर मूंखे मिलियो निन्ड वटां!
3.
तो में ऐ निन्ड! भरियलु केॾो न आनन्दु अती
तूं अचियो शान्त ॾीं जीवन खे जा मांधाणि मती
मां त समझां, वियो ॼणु लुटिजी ख़ज़ानो मुंहिंजो
जे खसे कोई मूंखा निन्ड जी हिकड़ी बि रती
शाम जो ढिरकंदो घरि साही पटण लाइ वरां
फ़ज़ल तुंहिंजे खां मगर सुबह जो थियो मस्त पवां!
4.
तूं हसीन खे हसीन सर्सु बणाए थी छॾीं
खु़श्क चेहरनि खे चमक ॾेई रॼाए थी छॾीं
अण मयो माणु तूं शक्तीअ जो ऐ निंदरा देवी
उमिरि इन्सान जी तूं कीअं न बधाए थी छॾीं
तुंहिंजी कुव्वत खां थी कुश्तनि जी करामत न वधीक
तुंहिंजी फ़रहत खां थी दुनिया में का फ़रहत न वधीक!
5.
फ़िके़ गु़रबत खां छॾाए थी छॾीं लहज़नि लइ
हांव जो बारु हटाए थी छॾीं लहज़नि लइ
जागं/दे सुहिणे सुठे घर में रहण लाइ सिकां
ख़बाब में तंहिं में पुॼाए थी छॾीं लहज़नि लइ
तुंहिंजो आग़ोश गदेलनि खां थियो नरम वधीक
आहि औरत जी मुहबत खां बि सो गरम वधीक!
6.
चूसिजे खू़न थो हिक तरफ़ त ॿिये तरफ़ वरी
खोटि जी कान थी पूरी थिए हिकड़ी बि ज़री
तुंहिंजे ई ज़ोर खां छा मेहनती जनता थी जीए?
तो ई छा तन जे रॻुनि में आ खणी जान भरी?
इन्तिहा आहि मुसीबत जी मगर पहुची वेई
ॾिसु त बुख निन्ड मथां की अं न रही टहक ॾिए!
