बीमार सभ्यता / अर्जुन ‘शाद’
सॼी इन्सान ज़ाति
हिक बीमार सभ्यता जी
औलाद आहे,
जंहिं या त
नांगनि एं बलाउनि जी पूॼा कई आहे
या पत्थर जे मूर्तुनि जी
या
तुर्बतुनि जी
बाहियुनि ऐं दरियाहनि जी
या ‘विज़र्ड्स्’ ऐं ‘विचिज़’ जी
जादूअ जी,
फिलासाफ़रनि
पहिंजी ऑला ॼाण जी,
मुज़ाहरे करण लाइ
कएं नमूननि जा ईश्वर ठाहिया
आत्माऊँ ठाहियूं
अहिड़ीअ तरह
इन्सान हमेशह झुकंदो ई रहियो
कंहिं ॿिये जे अॻियां;
संदसि मनु
हिरास में रहियो
हू वहमनि ऐं संसनि जो
शिकारु थी वियो;
इहो आहे उत्तम वसो
जेको
असां खे सभ्यता ॾिनो आहे!
इन्सानु
परेशान आहे
हू डप जे राकास खां
अञां पाण खे आजो न करे सघियो आहे
डपु, डपु आहे
पोइ इहो
नांगनि ऐं बलाउनि खे नाराज़ करण वारो हुजे
या ईश्वर खे;
साइन्सदाननि
‘लैबारेटरियूं’ खोले
इएं समझियो
त कुदिरत जे ॻुझनि में
हथु विझी
असां
इन मथां फ़तह पाइणु शुरू कई आहे;
इन्सान जे मन में
वधीक छिकताण पैदा थी
हू न हितां जो रहियो
न हुतां जो,
साइन्स् हुन खे दिमागु ॾिनो
दिमाग़ सोचींदो रहियो
पर उहो थकिजी पियो
कुझु हासिल न थियो
मन जी छिकताण
परेशानी ऐं पीड़ा
अॻे खां वि
वधी वेऊं
इन्सान जी हालत
बदतर थी वेई
न वहम जो सहारो
न साइन्स् जो साथु
इन्सानु
न हितां जो रहियो आहे
न हुतां जो!
