भारत की संस्कृति के लिए... भाषा की उन्नति के लिए... साहित्य के प्रसार के लिए
सखि नीके कै निरखि/ तुलसीदास
Kavita Kosh से
(19)
रागकेदारा
सखि! नीके कै निरखि, कोऊ सुठि सुन्दर बटोही |
मधुर मूरति मदनमोहन जोहन-जोग,
बदन सोभासदन देखि हौं मोही ||
साँवरे-गोरे किसोर, सुर-मुनि-चित-चोर,
उभय-अंतर एक नारि सोही |
मनहु बारिद-बिधु बीच ललित अति,
राजति तड़ित निज सहज बिछोही ||
उर धीरजहि धरि, जनम सफल करि,
सुनहि सुमुखि! जनि बिकल होही |
को जानै, कौने सुकृत लह्यो है लोचन-लाहु,
तारितें बारहि बार कहति तोही ||
सखिहि सुसिख दई, प्रेम-मगन भई,
सुरति बिसरि गई आपनी ओही |
तुलसी रही है ठाढ़ी पाहन गढ़ी-सी काढ़ी,
कौन जानै, कहाँतें आई, कौनकी को ही ||
