भारत की संस्कृति के लिए... भाषा की उन्नति के लिए... साहित्य के प्रसार के लिए
जेरऽ / कुंदन अमिताभ
Kavita Kosh से
हम्में ओकरा सें भजैलियै जेरऽ
ओकरा सें नै
डग्घर पेॅ उड़ी रहलऽ
धूरा गरदा सें लेटैलऽ
नाक नेटा सें सनलऽ
नंगटे घूमी रहलऽ
हिन्नेॅ हुन्नेॅ
कड़कड़ुअ्आ रौदा में
बतरू सें
जेकरऽ बातऽ में मिठास छै
बड़ऽ-बड़ऽ आश छै
सपना केरऽ सतरंगऽ घोड़ा पर सवार
जेकरऽ चेहरा में सूरज केरऽ उजास छै।
हम्में ओकरा सें भजैंलियै जेरऽ
ओकरा सें नै
बैहारी में लागलऽ गहुमऽ के गाछ सें
जे पीरऽ-पीरऽ सरसों फूल साथें
झुमतें रहै छै हवा में
आरो भरतें रहै छै हृदय में
उनमुक्त आरो निश्चछल सरंग।
हम्में ओकरा सें भजैंलियै जेरऽ
ओकरा सें नै
माय केरऽ खिस्सा सें
जेकरा में रहै छै शीत बसंत के खिस्सा
जे ऐन्हऽ दै छै थपकी
ऐन्हऽ दै छै उमंग
आरो ऐन्हऽ जगाबै छै उत्सुकता
कि नींद में हेरैला के बादो
मऽन माय के गोदिहै
में जमलऽ रहै छै।
