भारत की संस्कृति के लिए... भाषा की उन्नति के लिए... साहित्य के प्रसार के लिए
डिगा रहल हे पांव / जयराम दरवेशपुरी
Kavita Kosh से
रोटी के सपना में सपरल
हलूं हकासल दुन्नू शाम
लउट के अइलूं अप्पन गाम
लहकल दूपहरी अप्पन खून पसेना जरा लेलूं
देह के रोमा रोमा तक हम रोटी लगी सिझा अइलूँ
रातो बुतरून सुत सुत जा हल
रोटी के ले नाम
कत्ते दिन से घर के चूल्हा चक्की हकइ उपासल
निम्मक पानी पी-पी हकूं भूख साँप के डांसल
नुनुआँ के कपसल सन बोली
डिगा रहल हे पाँव
के छिनलक आगू के थरिया फोहवा कंठ के दूध
सोंच-सोंच के ओझरा जाही ई जोखिम के युद्ध
लाज शरम के धो-धा पीलूं
मलिको निमकहराम
कमियाँ सब मजदूर के अखनी लगल हको कुभेटी
एकर दहशत से दहलल हे ढील होतन गन टेंठी
धोखेबाज धधाल सभे के
मुर्छा मंतर सुबहो शाम।
