भारत की संस्कृति के लिए... भाषा की उन्नति के लिए... साहित्य के प्रसार के लिए
हम हसुआ धार / जयराम दरवेशपुरी
Kavita Kosh से
जगमग जिनगी के लुरठल हम तार ही
खेती के धंधा हे से से लाचार ही
जेठ दुपहरिया में देहिया जरावऽ ही
मटिया के जोत-कोड़ रंगोली सजावऽ ही
सब्भे के जिनगी के हमहीं आधार ही
मांड़ऽ नियन अँखिया के लोर दम पसावऽ ही
मेहनत के मोती हम औघड़ लुटावऽ ही
तइयो देह नंगा हमहीं उघार ही
झेलऽ ही लंद-फंद मीठ जहर बोली
तइरे करेजा में मार रहल गोली
ठहरऽ ने, तोहरा ले हम हँसुआ धार ही
हम्मर कमइयां के दाम तूं लगावऽ हा
हमरे उपजइलका पर मोंछ के पियावऽ हा
गफलत में गवां देलूं चीन्ह अधिकार ही
