हजारो गम में रहेले माई / मनोज भावुक

यदि इस वीडियो के साथ कोई समस्या है तो
कृपया kavitakosh AT gmail.com पर सूचना दें

हजारो गम में रहेले माई
तबो ना कुछुओ कहेले माई

हमार बबुआ फरे-फुलाये
इहे त मंतर पढेले माई

हमार कपडा, कलम आ कॉपी
सँइत-सँइत के धरेले माई

बनल रहे घर, बँटे ना आँगन
एही से सभकर सहेले माई

रहे सलामत चिराग घर के
इहे दुआ बस करेले माई

बढे उदासी हिया में जब-जब
बहुत-बहुत मन परेले माई

नजर के काँटा कहेलीं रउरा
जिगर के टुकडा कहेले माई

'मनोज' हमरा हिया में हरदम
खुदा के जइसन रहेले माई