गुमेजण कविता / रामस्वरूप किसान

म्हारै में विधाता
न्यारी ई कर राखी है
कै कमरै में बैठ‘र
कविता नीं कर सकूं

म्हैं तो
सूड़ काटतो, अर लावणी करतौ
ई कविता कर सकूं

म्हारै मांय सूं तो
हाड़ फोड़‘र पीसनै रै बंट
निकळै कविता

लोग पूछै-
खेती करतै थकां
कविता सारू टेम
किंयां उबारौ ?

म्हैं केवूं-
ऊबरयोड़ै बासी बगत नै
दाय नीं करै
म्हारी गुमेजण कविता
आ तो उण तातै
बगत नै ई खाणो चावै
जकै नै म्हारौ
किरसी-कर्म खावै।