भारत की संस्कृति के लिए... भाषा की उन्नति के लिए... साहित्य के प्रसार के लिए
अंधारपख / श्याम महर्षि
Kavita Kosh से
Sharda suman (चर्चा | योगदान) द्वारा परिवर्तित 09:08, 18 अक्टूबर 2013 का अवतरण
अंधारपख रै
सियाळै री लाम्बी रात
भिजैड़ी कांबळ दांई
म्हनैं घणी भारी लागै
अर म्हारै अन्तस मांय
जगावै अमूझ,
काळूंस लदपद
इण रात मांय
सुपना री मोर पांख
पगल्या करै
अर उडीकै
सूरज रै घोड़ा नै
बिछाऊ पलक पांवड़ा
सूरज पैली किरणा नैं
इण भरोसै
बिताऊं हूं सारी रात
अर हिचकू
इण काळी सुरंग सूं निकळ नैं!
