भारत की संस्कृति के लिए... भाषा की उन्नति के लिए... साहित्य के प्रसार के लिए
हूणियै रा होरठा (5) / हरीश भादानी
Kavita Kosh से
आशिष पुरोहित (चर्चा | योगदान) द्वारा परिवर्तित 07:47, 29 नवम्बर 2013 का अवतरण ('{{KKGlobal}} {{KKRachna |रचनाकार=हरीश भादानी |संग्रह=बाथां में भूग...' के साथ नया पन्ना बनाया)
सीयाळै में तापलै
रगड़ हाड सूं हाड
ऊनाळै उकळीज
ठरै पसीणै हूणिया
गिट सीयाळै डांफरांे
लू ऊनाळां पी’र
आया जुग-जुग जी’र
जुग-जुग जीसी हूणिया
गाभण हुयलै छांट सूं
बांझ बाजती रेत
जामै हरियल टांच
मोठ बाजरी हूणिया
बिछी जमीं नै पसरलै
आभौ लेवै ओढ
रातां गीला होय
दिन में सूकै हूणिया
आभौ आंरी अंगरखी
तावड़ियौ है पाग
हवा अंगोछो हाथ
रेत पगरखी हूणिया
मोठ बाजरी मूंग गऊँ
रळा बणावै खीच
दांतां तळै दळीज
जीभ छोलसी हूणिया
लीलां लीलां चरण री
पड़ी जकां नै बाण
एकर सी तौ चाल
भाठा पुरसां हूणिया
मीठा-मीठा लेयग्या
बाजार मोठ मतीर
एकर तूंबा बीज
भूख जीमतौ हूणिया
