नई उमंग और नई रोशनी / करतार सिंह कैत
नई उमंग और नई रोशनी शुभ सबको नया साल रहै
करूं कामना बाबा साहब तै देश मेरा खुशहाल रहै।...टेक
म्हारी बंजड़ भूमि हो उपजाऊ अन्न के भरे भंडार रहैं
बागां के म्हं कोयल बोलै इसी छाई मस्त बहार रहैं
डाल डाल कै फल लागैं और चमन सदा गुलजार रहैं
ऐसी करूं कामना सबका सुख संपत परिवार रहैं
खुशियों के दीप जलैं हर घर म्हं ना कोई रंज मलाल रहै।
करूं कामना बाबा साहब तै...।
एकता और अखंडता खात्तर म्हारा एक इशारा बण्या रहै
जय भीम और जय भारत का देश म्हं नारा बण्या रहै
नए साल म्हं करूं कामना एक नया नज़ारा बण्या रहै
सभी दलित रहैं मिलकै म्हारा भाई चारा बण्या रहै
हर मानव हो बुद्धिजीवी सबका ऊंचा ख्याल रहै
करूं कामना बाबा साहब तै...।
उन वीरों खातर करूं कामना जो डटे सरहद पै जाकै
सेना हो मजबूत म्हारी ना कोए देखै आंख उठा कै
जो छेड़ण का साहस करै वा बैठे मुंह पिटवा कै
म्हारे तिरंगे को नमन करैं आड़ै लोग विदेशी आ आ कै
आयात और निर्यात करैं म्हारे जहाजों म्हं भर्या माल रहै
करूं कामना बाबा साहब तै...।
नए साल म्हं करूं कामना म्हारा करै तरक्की हरियाणा
प्रदेश की धरती सोना उगलै म्हारा दूध दही का खाणा
सच्चे करैं इंसाफ पंचायत कोर्ट पुलिस और थाणा
देवै मुबारकबाद सभी को करतार सिंह गा कै गाणा
मान्य भजन सिंह सतगुरु की सेवा मेरा नित चरणां ख्याल रहै।
