भारत की संस्कृति के लिए... भाषा की उन्नति के लिए... साहित्य के प्रसार के लिए
शरत आरो सुरुज / ऋतु रूप / चन्द्रप्रकाश जगप्रिय
Kavita Kosh से
Lalit Kumar (चर्चा | योगदान) द्वारा परिवर्तित 22:12, 30 मई 2016 का अवतरण ('{{KKGlobal}} {{KKRachna |रचनाकार=चन्द्रप्रकाश जगप्रिय |अनुवादक= |स...' के साथ नया पृष्ठ बनाया)
आश्विन के सुरुज केॅ
गुस्सा छै तेॅ यही लेॅ
कि अपनोॅ तिक्खोॅ किरणोॅ के बादो
नै मुरझावेॅ सकै छै
शरत सुकुमारी के रूप
जेकरोॅ कानोॅ मेॅ झूलै छै
दुपहरिया के फूल
आरो गल्ला मेॅ
हरशृंगार के गजरा।
आश्विन के सुरुज केॅ
गुस्सा छै तेॅ यही लेॅ
कि ओकरोॅ तिक्खोॅ किरणोॅ के बादो
शरत सुकुमारी के आँखी मेॅ
डोलै छै श्वेत कमल
एत्तेॅ छै निर्मल
नद्दी के पानी
कि उपरे सेॅ दिखै छै हेलतेॅ मछली
जेना शरते सुकुमारी के आँख रहेॅ।
आश्विन के सुरुज केॅ
गुस्सा छै, तेॅ यही लेॅ कि
ओकरोॅ तिक्खों रौद्र के बादो
कारण्डव जमलोॅ होलोॅ छै
अभियो नद्दी किनारा मेॅ
शरत सुकुमारी के पीछू-पीछू
