भारत की संस्कृति के लिए... भाषा की उन्नति के लिए... साहित्य के प्रसार के लिए
रामराजु का तुमतो काका कहे रहौ / प्रदीप शुक्ल
Kavita Kosh से
Sharda suman (चर्चा | योगदान) द्वारा परिवर्तित 01:18, 4 जुलाई 2016 का अवतरण ('{{KKRachna |रचनाकार=प्रदीप शुक्ल |अनुवादक= |संग्रह= }} {{KKCatKavita}} {...' के साथ नया पृष्ठ बनाया)
हाहाकार मचाए कक्का
सब लंगूर तुम्हार हियाँ पर
रामराजु का तुमतो काका कहे रहौ
तुलसी बाबा तो
रामराजु का
अईसन कबो बखान किहिन ना
रामचंद बानर सेना का
एतनिउ छूट तो कबो दिहिन ना
आजु तुमरिही रजधानी के
बाग़ उजारैं ई सब बांदर
रामराजु का तुमतो काका कहे रहौ
अब कक्का तुमका
का बताई
तुम ते तौ केतनी आस रही
तुम मउनी बाबा बने रहौ
बस देसु क सत्यानास रही
यहु देसु प्रेम तौ ठीक मगर
बस घबराहट है डगर डगर
रामराजु का तुमतो काका कहे रहौ
ओ कक्का!
तुमते बिनती है
अब छप्पन इंच देखाय देव
ई बंदरन का थपरा मारौ,
आँखी काढौ, डेरवाय देव
रोंकि लेव अबहीं इनका,
यहिते पहिले की फून्कैं घर
रामराजु का तुमतो काका कहे रहौ
