बेहोसीमा कतिकति / सुमन पोखरेल

 
बेहोसीमा कति कति आफैँलाई पिइदिएँ
दुःख सुनायो रातले सबै मैले लिइदिएँ

के भन्नु कसलाई भन्नु, कहाँ वेदना फुकाउनु?
निर्मम यी पलहरूलाई किन सुस्केरा सुनाउनु?
पाइला पाइला भेटिनेलाई हाँसो नै दिइदिएँ
बेहोसीमा कति कति आफैँलाई पिइदिएँ

बुझिन भन्दछन् सबै, चोट बुझिने कहाँ हुन्छ
एउटाले बाँचेको कथा अर्कोलाई नयाँ हुन्छ
जे जे भेट्टाएँ यात्रामा तिनैको माला उनिदिएँ
बेहोसीमा कति कति आफैँलाई पिइदिएँ