चलोॅ सखि मिली-जुली / रामधारी सिंह 'काव्यतीर्थ'
चलोॅ सखि मिली-जुली
बाल विकास विद्यालय हे
वहाँ जाय केॅ हमरासिनी
तुलसी-जयन्ती मनैवै हे।
तुलसी केरोॅ जनम भेलै
हुलसीं देलकै छोड़ी हे
आत्माराम के हृदय पत्थर भेलै
वोहूँ देलकै त्यागी हे
आबेॅ तेॅ तुलसी टूअर भेलै
केना केॅ जिनगी बचैते हे।
चुनिया दासी केॅ दया लागलै
पाली-पोसी देलकै हे
वाहा आबेॅ मरी गेलै
तुलसी दर-दर भटकै हे
पार्वती के कृपा भेलै
भोजन-पानी भेजै हे।
शंकरजी पसीजी गेलै
बाबा नरहरि पैलकै हे
पढ़ाय-लिखाय केॅ विद्वान बनेलकै
तुलसी विषयी बनलै हे
रतनावली मायके गेलै
तुलसी पिछुवैनें गेलै हे।
हाड़-माँस के ऐसनोॅ प्रेमी
दौड़लोॅ-दौड़लोॅ अइलै हे
एतना प्रेम जों रमोॅ सें हुएॅ
भवसागर तरो जावै हे
उलटे पाँव तुलसी भागलै
प्रयाग शहर में अइलै हे
गृहस्थ-वेष परित्याग करि केॅ
साधु-वेष धरलकै हे।
हनुमान के सहयोगोॅ सें
राम-लखन तेॅ भेटलै हे
शिवजी के आदेश भेलै
तोंय अवधी में रचना करोॅ जी
संवत सोलह सौ एकतीस में
रचना आरम्भ भेलै जी।
रचना पूरा होय गेला पर
तुलसी काशी अयलै जी
‘मानस मन्दिर में रखला पर
होलै ‘सत्यं शिवं सुन्दरम्’ हे
‘मानस’ भेलै महाकाव्य
आरू भेलै तुलसी के प्रसिद्धि हे।
समन्वय करोॅ विराट चेष्टा
लोकनायक भेलै तुलसी हे
युग-प्रवर्तक, दृष्टा कहलैलै
सन्त-भक्त आरू स्रष्टा हे
एतना भेले तेॅ की होलै
होले मर्यादावादी हे।
