अथ बिहार टी.वी. / शिवनारायण / अमरेन्द्र
नमस्कार हम्में बिहार छी
देशोॅ केरोॅ धड़कन
सुनोॅ जनवरी दू हजार पाँचोॅ के सबटा हाल
सभा विधानोॅ के चुनाव में
जे किनतीजा ऐलै
वै में किसिम-किसिम दल आरो
ओकरोॅ इन्द्रधनुषी नेता केरोॅ खुल्ला चेहरा
ताजा हाल सुनैयौं जानोॅ...
आबेॅ सबसें पहिलें देखोॅ
काँटोॅ में उगलोॅ बंगला दिश
जेकरोॅ मालिक बकरा आरो
बाघोॅ के गोदी में बैठी
मेमना केॅ ताज पिन्हाय लेॅ चाहै
वैसे तेॅ एकरोॅ बंगला में
एक्को मेमना कभियो भी नै जीती ऐलै
तैहियो वैं चाहै छै ई कि
ओकरे वही चुनावी वादा जकां मुताबिक
कोय मेमनै के माथै पर ही
ताज राज के राखलोॅ जाय
यहू खबर छै आन दलोॅ सें ही कोय्यो
मेमनाहै केॅ अपनोॅ दल में
करलोॅ जाय इम्पोर्ट
जैसें बकरा आ मेमना के
सद्भावोॅ, आ शांति विकास लेॅ
पुरेॅ खुराको ठो बाघोॅ केरोॅ।
चलोॅ, चली देखौं बंगला में
मेमना, बकरा, बाघोॅ केरोॅ
निभै दोस्ती छै कब तांय ही
इखनी तेॅ रुख एकरे दिश छै
तीर निशानोॅ पर खिल्लोॅ टा कमले दिश
जहाँ उधो माने के बातोॅ के तरजोॅ पर
हर छोटका-बड़का नेता ठो गुर्राबै छै
झपटी लै लेॅ ताज जहाँ सब चकराबै छै
कि बिहार के जनता सबनें
पन्द्रहसाला सरकारोॅ के होय खिलाफ में
जनादेश केॅ जे देलेॅ छै
जेकरोॅ सीधा मतलब छै कि
ताज अगर जों राखलोॅ जाय तेॅ ओकरे सर पर
सातो सुर में
सत्ता सुख के अनटेटलोॅ रागे ठो
आखिर कमलोॅ केॅ तोरोॅ सें
लक्ष्य भेद ठो करतै
आरो अभी-अभी ही हमरा खबर यहू मिललोॅ छै-
झारखण्डी कमलोॅ केरोॅ तरजे टा पर
कमल बिहारी तीर-निशाना
साधी रहलोॅ बंगला परकोॅ भेड़िया पर छै
आरो जों विश्वासी सूत्र के हम्में मानौं
तेॅ, ई दाफी बंगला केरोॅ भेड़िया ठो केॅ
झारखण्ड के कोनोॅ इस्पाती शहरोॅ में
सैर करैतै आरो हुनके ही सीढ़ी ठो
सत्ता केरोॅ मंजिल पैतै।
तेॅ, आबेॅ है लेलियौं हम्में
एक छोटों रं ब्रेक जरा-सा
पर ब्रेकोॅ में जाय सें पहिलें
तोरा यहू बतैलेॅ जइयौं
कि मेराथन दौड़ हाथी आ साइकिल केरोॅ
बंगले दिश छै/ जबकि लाल सलामोॅ साथें घड़ियो
इम्पोर्टेड हाथोॅ केॅ थामै लेली
लालटेने-इंजोरोॅ में निरयासी रहलोॅ
राजसिंहासन केॅ देखौ नी टुकुर-टुकुर की।
बाकी बेंगो के टर्रम-टोंय
जहाँ-तहौ नी पड़ै सुनाय छै
आबेॅ हम्में लियौं ब्रेक, तोंय देखतें रहियौ
राष्ट्रपति के शासन केरोॅ नज्जारा ठो
मनझमान नै होय्योॅ कटियो
हम्में थोड़े टा वक्ती में लौटी ऐबौं
देखलैबौं ऊ न्याय सामाजिक
केरोॅ असली ताकत तोरा
जैमें होतै दंगाई आरो
रामलीला मंडलियो केरोॅ मंसा नांगटोॅ
जेकरे तेलोॅ सें
मशालो के धोवियापाटो जरै छै
आरो बंगला के रंगस्थल सत्यानाश
जेकरा केकरो दूसर्है केरोॅ हाथ झुलाबै छै
इन्द्रधनुषी सपना मेॅ
