देशभॻतु / आसन वासवाणी 'मजबूर'
देश भॻत थियण लाइ
इहो आहे बिनह गै़रज़रूरी
त अव्हीं ईमान्दारीअ सां
नौकरी धंधो कन्दा अचो।
सरकारी कानून जे तहत
पंहिंजनि टैक्सनि जी
पूरी अदाइगी कन्दा अचो
ऐं आदर्श नागरिक तौर
शहर, ॻोठ जे बहबूदीअ ऐं तरक़्क़ीज लाइ
पंहिंजो पूरो ॾियो
साथु सहकारु।
.........
लिहाजा, देशभॻत थियण लाइ
इहो आहि बिनह ज़रूरी
त अव्हीं हुकमरान सरकार जी
हर हमेशा ऐं हर हालत में
ज़ाहिर ज़हूर करियो हिमायत,
उन्हनि जे मिड़नी ग़लतियूनि ते
करियो चश्मपोशी
ऐं आईंदा जे ख़तरे खां
खेनि आगाह करण खां अचो बाज़।
पंहिंजे दिल ऐं दिमाग़ ते लॻायो तालो
नारे, बयान, इश्तहारबाज़ीअ ज़रीए
नासमझ अवाम खे करियो गुमराह
पोइ अव्हां
हर क़ानून जी इन्हराफ़ी करण जा
थी वेन्दा हक़दार-
अव्हां जो हर गुनाहु
बेगुनाहीअ जे दाइरे में
थी वेन्दो अज़खुद दाखि़ल,
अव्हां खे इल्म, महिनत, इंतज़ाम
सचाई ऐं दूरांदेशी
जे बेकार जवाबदारियुनि खां
कयो वेन्दो आज़ाद
ऐं
देशभॻतनि जी फ़ेहरस्त में
अव्हां जो नालो
अवसि थी वेन्दो दर्जु।
