वालारियल धरती / हरीकान्त
संग्राम समाप्त थियण खां अगु ई
घावनि ॻणण जे मोह
पाण सां डोहु थीन्दो
जाचणु अगर ज़रूरी हुजे
त सिर्फ़ इहो ॾिसो
सरीर जो कहिड़ो हिस्सो ख़ाली आहे अञा
संगीनुनि जे स्वागत वास्ते
हीअ असांजी आखि़रीनि लड़ाई आहे
डंद-कथाउनि उसूलनि खे ताक़ ते उछिले
हाजु़र हक़ीक़तुनि सां दूबदू थियणो पवन्दो
अहिंसा जे बहालीअ वास्ते
हिंसा जो इस्तइमालु
हलाल बणिजी पवन्दो आहे कॾहिं...
शांतीअ जी तलाश
असां खे उन क़ब्रिस्तान में पहुचायो आहे
जिते सफ़ेद कबूतरनि जा पंख परियल आहिनि
अचो सोचे वठूं
पंहिंजा कटियल उज़्वा
असीं किथे दफ़नाईन्दासीं
धरती सॼी वालारिजी वेई आहे।
भूमीअ जो उहो टुकरो
मां उभिरियो होसि जंहिं ते सदियूं अॻ में
हड़प करे विया शैतान
पंहिंजा पंहिंजा ईदगाह
ऐं गऊशालाउं बणाइण वास्ते
उखेड़े बड़ खे जड़ खां
ठोके छॾियो कूंडियुनि में टारी टारी करे
झंगल जे ठेकेदारनि
संदनि इन कारस्तानीअ खे
शैतनी चइजे या नादानी
अव्हां ई बुधायो!
