हिक मछीअ खे मुख़ातिब / वासदेव 'निर्मल'
मां बम्बईअ में जुहू जे भरिसां
समुंदर किनारे अखो पायां वेठो
ऐं पाणीअ में केई मछियूं
ॼणु झिमिरि पेयूं पाईनि
ऐं हिकिड़ी मछी
ख़ूब पेई टपा ॾिए
ऐं वर वर ॾिसे पेई मूं ॾांहुं।
मां आदत खां मजबूर
उन ॾांहुं,
अटे जा नेढा गोला ठाहे थो उछिलायां
झटण लाइ उहे गोला
हिकदम मछियूं थियूं भिड़नि।
दिल ते हिकदम तरी थो अचे,
साॻियो उहो नज़ारो
जॾहिं मां, क्यामाड़ीअ ते इएं
मछियुनि खे अटे जा नंढा गोल
खाराईन्दो होसि, हर चंड ते।
मां कुझु सोचे हिकिड़ीअ मछीअ खे
चवां थो, ऐ मछिली!
मुंहिंजो कमु कन्दीअं हिकु?
अखो पाईन्दे जेके चांवर कणा
मां फिटा पियो करियां
तिनि मंझां के कणा
पंहिंजे मुख में झटे,
तूं कराचीअ खणी वञु।
जो तोखे त कोई बि रोके न सघन्दो;
न वीज़ा खपेई, न पासपोर्ट!
कराचीअ में पहुची
क्यामाड़ीअ भरिसां
इन्हनि चांवरनि जे कणनि मां ॿ-टे,
मुंहिंजे पारां
अखे तोर पाणीअ में पाए छॾिजि,
ऐं बाक़ी कणा भी, निहायत अदब सां
किनारे ते मिटीअ मथां
इएं सिंधु जी पाक मिटीअ ते पाए अखो
थोरी साही पटिजि
एंे पोइ सिंधु जी पाक मिटी ज़रा,
तूं खणी
मोटी मुम्बईअ अचिजि।
कियामाड़ीअ ते मां अखो पायां
मुंहिंजी इहा हिक तमन्ना
जा सालनि खां सीने में सांढे रखीऽथमि
उहा, काश! पूरी थिए इएं
परियुनि खां प्यारी मछी!
मां कन्दुसि तुंहिंजो इंतज़ारु
तूं मुंहिंजो इहो कमु कन्दीअं?
चउ कन्दीअं?
चउ कन्दीअं?
