फ़िज़ा उन ॾींहुं बि खु़शगवार हुई / रतन आॾिताणी
हिक ॾींहुं
हू समुंड जे किनारे ते बीठो हो
शायद बेमतलब!
न न, लहन्दड़ सिज जी सूंहँ माणण
ऐं छोलियुनि जो आवाज़ु बुधण लइ
बीठो हो। ओचितो,
लहरुनि में लुढ़न्दो हिकु इनसनी बुतु
किनारे वटि आयो,
हुन कढियो।
हयात हो-हू बेहद खु़श थियो
उन खे हुन ज़ाल बणायो
ऐं घरि वठी आयो।
अहिड़े ई हिक ॿिए ॾींहुँ
हुन हिकु बुतु लहरुनि मां कढियो ऐं
उन खे पंहिंजो ॿारु समुझी
घरि वठी आयो।
इन नमूने खेसि हिकु पाड़ेसिरी हथि लॻो
हिकु मित्रु ऐं हिकु माइटु।
जॾहिं सभु पंहिंजी पंहिंजी जॻहि ते
सेटिल थी चुका
त हुन पंहिंजा हाल बुरा पाता।
हुन महसूस कयो त हुननि खे
समुंड मां कढी
हुन चुक कई हुई,
हुन सभिनी खे वरी समुंड में धिकेलणु चाहियो
पर हुननि न कई, समाज न कई,
खु़द हुन जे ज़मीर बग़ाग़ो मचायो।
पोइ छा थियो?
थियो उहो ई, जो थियण वारो हो!
हुन खे ई लहरुनि में
लुढ़ी वञिणो पियो।
मातम मनाइण वारनि जो आवाजु़
समुंड जी गजगोड़ में बुॾी वियो
पर हुन जे पुठियां कोई बि न वियो,
कोई बि न!
उन ॾींहुँ बि फ़िज़ा ख़ुशगवार हुई
ऐं फहलियल हुई शफ़क़ ते
लालाणि, लहन्दड़ सिज जी।
