आकासु अची रहियो आ हेठि / रतन आॾिताणी
आकासु अची रहियो आ हेठि
ॼणु किरियो ॼाणु किरियो
तव्हां जा किरोड़ें हथ
नरोके सघन्दा हाणि
किरिण खां उन खे।
तव्हां, जेके
सिज चंड जे सच खां मुनकिर थिया
उन्हनि जो पूजन करे
तव्हां, जेके
वॾनि जे नाले जी ओट में
हर झूनी रीति रस्म खे निबाहिण जी,
सदा-ॾीन्दा रहिया
तैयार थियो! तैयार थियो!
तव्हां जे नज़र जे सामुहूं
तव्हां जे देवताउनि जे सीने ते
थीन्दी क़दमबोसी-हाणि,
तव्हांजी चांदनीअ खे चुमंदा केई
खुल्लम खुल्ला
नवंनि रिश्तनि नातनि जे बादलनि में विहारे
घॿराइजी वेन्दा तव्हां
तव्हां, जेके हर नाते खे
कंहिं नाले सां
सॾण जा आदी रहिया आहियो।
संभालियो सीना पंहिंजा
तारा किरन्दा केई
अॻे अखियूं चुंझियूं कन्दा हुवओ न,
तारा ॾिसण लाइ?
हाणे इएं करण जी ज़रूरत कान पवन्दी
तव्हां जा तारा फाटी वेन्दा!
तव्हां जो आकासु
हीउ झूनो आकासु
हाणि छीहूँ छीहूँ थियण ते आहे
तव्हांजे बुजु़र्गनि जूं सेमीनारी सलाहूं
जे तव्हां टुॿिकनि जे रूप में
हर जॻहि उभियूं करे रहिया आहियो
नाकाम साबित थींदियूं
नओं मनज़रु पसण लाइ
लोह जो जिगिरु ऐं उकाब जूं अखियूं खणी अचो
पोइ न चइजो त ख़बर कान हुई
त हींअं अची आकासु हेठि पवन्दो!
आकासु अची रहियो आ हेठि।
आकासु अची रहियो आ हेठि।
