भारत की संस्कृति के लिए... भाषा की उन्नति के लिए... साहित्य के प्रसार के लिए
शंख / वासदेव मोही
Kavita Kosh से
Lalit Kumar (चर्चा | योगदान) द्वारा परिवर्तित 17:53, 1 अक्टूबर 2016 का अवतरण ('{{KKGlobal}} {{KKRachna |रचनाकार=वासदेव मोही |अनुवादक= |संग्रह= }} {{KKCat...' के साथ नया पृष्ठ बनाया)
मां शंख फूकीन्दो नाहियां
कन ते रखन्दो आहियां
ऐं बुधन्दो आहियां
किनारनि जी भुणि भुणि
छोलियुनि जी धुकार
गुर्राईन्दड़ हवाऊं
पखियुनि जा कीकाट
माछियुनि जा स्यापा
ऐं
ॾारीन्दड़ बादल
कड़कन्दड़ बिजिलियूं
परे परे
पाणीअ हेठां लिकल चट्टानुनि जे वेझो
लाईट हाउस जे घुघूअ जो चीख़ाटु
उन्हनि सैलानियुनि जा घघा आवाज़
जे बुडन्दड़ जहाज़ में
हिक ॿिये खे हिमथाए रहिया आहिनि।
पोइ शान्त
बिलकुल शान्त समुंड जे आरसीअ में
सभु अक्स बिगाड़े छॾीन्दड़
कंहिं शरारती ॿार जे
फिटी कयल पत्थर जी छपक
ऐं खाड़ीअ जे हुन पार खां
घोट खां मोकिलाइण वक़्ति
नवेलीअ जो दॿियलु सुॾिको
हवा में तरन्दो तरन्दो
अन्दर में वॼन्दो आहे।
मां शंख फूकीन्दो नाहिया
कन ते रखन्दो आहिया।
