मां मरी चुको आहियां / खेमन मूलाणी
मां मरी चुको आहियां
मुओ त अॻे बि होसि
पर हाणे
पूरीअ तरह मरी चुको आहियां
मुओ तॾहिं बि होसि
जॾहिं मुंहिंजे पेरनि हेठां
ज़मीन खिसिकी वेई हुई
ऐं मां
उछांग मारे
दूर वञी किरियो होसि,
पर उन वक़्ति
मूंखे गहिरो ज़ख़्म रसियो हो
सिरु सलामत हो
मुओ तॾहिं बि होसि,
जॾहिं मुंहिंजो सरीरु
रंग मटाइण लॻो हो
पर उन वक़्ति
मूं फ़रीख़दिलीअ सां
पाण खे दोखे में रखियो हो
रंगु मटिजण सां कोई
मरन्दो थोरे ई आहे।
मुओ तॾहिं बि होसि,
जॾहिं मुंहिंजी ज़बान
पंहिंजो रूपु बदिलाइण लॻी हुई
उन वक़्ति
मां अणॾिठे डप खां
हिरासिजी वियो होसि,
लेकिन
तेसताईं मां बेवस बणिजी चुको होसि-
ऐं अजु
जॾहिं मुंहिंजा स्वास
मूंखां अलॻ थी विया आहिनि,
तॾहिं पक थी अथमि
त
मां मरी चुको आहियां।
अजु
मां छॾे वञी रहियो आहियां,
पंहिंजो सरीरु
जंहिं जो रंगु मटियलु आहे
पंहिंजी ज़बान
जंहिं जो रूपु बदिलियलु आहे
ऐं मां
पूरीअ तरह
मरी चुको आहियां।
