चाकलेट / गोप कमल
तूं शायद
वञी चुको हून्दें
अजु सुबुह जो आफ़ीस वेन्दे
तो कंहिं सां फोन ते
ट्रक जे बन्दोबस्त लाइ
ॻाल्हायो पिए
अजु तूं
पंहिंजो हीउ पुराणो घरु छॾे
वञी पंहिंजे नएं फ्लैट में
थांईको थियो हून्दें।
तो खे इंचु इंचु थी
वॾो थीन्दो ॾिठो आहे
मुंहिंजियुनि अखियुनि सां गॾु
हिन घ्ज्ञर जे दीवारुनि
दर दरियुनि, पलंग ऐं गदेलनि
कॾहिं इन्हनि गदेलनि खे
तूं निंड में आलो करे छॾीन्दो हुएं
कुझु सालनि खां वठी
तोखे हिन घर मां
घर जे हर पुराणी शइ मां
उॿथा अचण लॻा हुआ।
तॾहिं हिक ॾींहुं
बबलूअ अची बुधायो हो
ममी पपा सां गडु
हू जल्दु
नएं फ्लैट में रहण वेन्दो
पर उते पिणि
चाकलेटु ज़रूर आणियां
साॻिई आदत जो जहिड़ी।
मूंखे अजु ताईं
तुंहिंजी उहा शिकिल याद आहे
जॾहिं रुअन्दे रुअन्दे
तूं नोड़ीअ ते टंगियल
धोतल चढीअ जे खीसे में
खटमिठिड़ो ॻोल्हे रहियो हुएं
उन ॾींहुं तो मूंखां
अंजामु वरितो हो।
ऐं मां रोज़ तो लाइ
खटमिठिड़ा आणीन्दो होसि
पहिरीं तो लाइ
एंे पोइ बबलूअ लाइ
काल्ह ताईं
नंढिड़ो बबलू
दरु खोले पहिरीं मूंखां चाकलेटु फुरीन्दो हो
ऐं पोइ घर अन्दर अचणु ॾीन्दो हो।
पर अजु... केतिरी देर
अजायो रस्तनि ते रुलियो आहियां
घर जे दरवाजे अॻियां
ॿिचितो थी बीठो आहियां
घंटी वॼायां
या चाॿीअ सां दरु खोलियां!
पर चाॿी आहे?
खीसे में हथु विझां थो
रिजियलु चाकलेटु
हथ खे चंबुड़ी पवे थो
चिपचिपो हथु ॿाहिर कढां थो
घंटी वॼायां?
शायद तूं...
(ज़िन्दगी- 1998)
