बन्द कमरे जा आवाज़ / मोहन हिमथाणी
चांडोकी रात में
थकावट भरी निंड
न पूरी थियण जी कैफ़ियत में हुन
सुबुह जे ताज़गी भरिए माहौल में
ग़लाज़त भरीन्दे
सिगरेटु दुखायो
ऐं कमरे जे कुंड में दर वटि
पट ते अची वेठो
नज़र वञी पियसि
पलंग जे घुंजियल चादर
ऐं धुॿ पियल विहाणनि ते
टिड़ियल पखिड़ियल हंध जो विच वारो हिस्सो
थोरो वधीक नरम पियो भासे
चादर हिक पासे वधीक लटिकियल।
मेज़ ते रखियल
व्हिस्कीअ जे आखि़री ढुक सां भरियल
ॿ गिलास
ऐश ट्रे में अध-जलियल सिगरेट
सोनहिरी कढ़ाईअ वारी
कारे मख़मल जी
हिक-ॿिए मथां चढ़ियल जुती
अध-खुलियल दर मां पसिजन्दड़
शानदार बाथरूम में
थियल हलचल जी झलक
गुलदान में रखियल
कोमाइजी वियलनि गुलनि मां ईन्दड़
कसारी खु़शबू।
शफ़ाफ़ पर्दनि मां छणिजी ईन्दड़ रोशनी
ॼणु कमरे जी हर
बेतरतीब शइ खे
तरतीब में अचण जी
हिदायत करे रही हुई।
शायद सिजु
अध रात जो कमरे मां
झाती पाए वियो हो,
जॾहिं
ॿरन्दड़ रेशमी जबलनि जी छांव में
चंड जी सीतलता बि खेसि
खिन पल लाइ विसारे वई हुई।
हू अञा बि उते ई वेठो हो।
सिगरेट जे दूंहें जा छला उॾाईन्दें
यकटिक निहारे रहियो हो
पंहिंजे साधे जी ॻोल्हा में
...जबलनि ते चढ़न्दड़ केलीअ खे
ऐं पंखे जी तेज़ हवा में
कमरे अन्दर हेॾांहुं होॾांहुं
(पट ते) उॾामंदड़
रेशमी चगुनि जे मुचे खे।
ओचितो ख़ड़को थियो
हिकु आवाजु़ तेज़ीअ सां
बन्द कमरे जो दरु खोले
निकिरी वियो।
