सिन्धी / अर्जुन ‘शाद’
सिन्धीअ जो जिते थो ख़ून रहे
उन ख़ून मुक़द्दस जे अंदर
हिम्मत थी सदा सुहिणीअ जी रहे
मारुईअ जी उते गै़रत थी रहे
ग़ैरत खे भुलाए की अं सघां
सिन्धीअ जो शर्फ़ आहेमि मिल्यो
मां फ़ख़ुर सां सिन्धी सॾाईंदुसि
मां शाह जी प्यारी ॿोलीअ खे
पंहिंजनि प्राणनि में समाईंदुसि!
इन्सान आहियां, इन्साननि जियां
ग़फ़लत बि करे विहंदो आहियां
पर निन्ड मंझां जाॻण खां पोइ
ससुईअ वांगुर उथन्दा आहियूं
सो जोश खणी दिल जे अन्दर
टकरनि खे लताड़ींदा आहियूं
डू/ंगर खे ॾकाईंदा आहियूं
हिन जोश खे ॾिसन्दी मंज़िल खु़द
थी मांदी थिये तालिब जे लाइ
जो जोश जे जज़्बे ॾे छिकजी-
ख़ुद ईंदो पुन्हलु आ ससुईअ ॾे!
अॼु हर सिंधी थियो मूमल आ
मूमल जी मुहबत राणे सां
सिंधीअ जी मुहबत सिंधीअ सां
अॼु आहि चनेसर जे आॾो
लीला जो रूप सच्चाईअ जो!
हित रोदन वारीअ दुनिया में
ॿीजल जो राॻु भरींदासीं
संसार खे सुर्ॻ बणाइण लाइ
सभु राइ ॾियाच थी पवंदासीं
जनता जी तरक्कीअ जी ख़ातिर
ख़ुद सिर भी उतारे ॾींदासीं!
ओ मुख मां बाहि कढण वारा
ओ जंगी नाद बॼाईंदड़
कुझु पंहिंजे तकबर खे रोकियो
अॼु शाह जी नूरी निमाणीअ जी
तस्वीर जहान खे आणे ॾियो
उन शाह जे विश्व मुहबत जो
पैग़ाम जहान खे पहुचायो
सिंधीअ जे सिखण जी दुनिया खे
अॼु ‘शाद’ जरूरत ई पवंदी
जो शाह जी कविता द्वारां ई
दुनिया खे अमन हासिल थींदो!
