इनामु / अमुल चैनलाल आहूजा 'रहिमी'
रात यारहें खां पोइ
खणी किताबु मां
पढ़हण वेठुसि ग़ौर सां
चाढ़हे बू/थ जोइ चयो जोश मां
कुरकयुइ पऐ ईंदे घर
आहियां थकल ॾाढो
पीआर कोप काफीअ जो
त
थियां वञी आरामी आऊँ
थकु थियो अथम ॾाढो सेमीनार मां
ॻोढ़हो हो विषय
मिली रूॻो रोटी हुई
ऐं
भाड़े जा रुपया ॿ सौ
ऐं
चयाईं वधीक
विञायो ॾींहुं सॼो सेमीनार में
ॾियो कीन था थोरो बि वक़्त मूंखे
या पंहिंजे सिकीलधे खे
ॾसियो त भला
वटियो भि अथव
साहित ऐं सेमीनारन मां कुझु
हर साल
इनामु बि त
ॿिया था खटी, खणी वञनि
सन्मान बि कोन थियो अथव कॾहिं!
चयुम चोॼ मां जोइ खे
ॾिनो अथम हीउ किताब जो
पढ़हां वेठो चाह मां
हिक सुठे विद्वान लेखक मूंखे बि
लेखक नाते सूखड़ी
जो वेचारे जो कोबि पढ़हे कोन थो
ऐं सिंधी साहित खे पाठक जी ॻोल्हा करणी पवे थी
अॻु
हिकु कवी
कविता ॿुधाइण लाइ ॿुधंदड़ि ॻोल्हींदो हो
हाण
लेखक, लेखक खे किताबु ॾिऐ थो पढ़हण लाइ
पर शायद कोबि लेखक
सिक मां मुफ्त में मिलयल सुखड़ीअ वारो बि किताब पढ़हे
नथो
मां
लेखक नाते
पढ़ही किताब मोकलींदुसि लेखक खे
रायो पंहिंजो ऐं जे
हिन किताब पढ़हंदड़नि खे इनामु ॾियण शुरु कयो त
पक ई पक मुंखे
इहो इनामु मिली वेंदो
मां सॼो पढ़हियो आहे किताबु ध्यान सां
इन ई उम्मेद सां त
हिक ॾींहुं इनामु ज़रूर मिलंदो
जो
इनाम आहिन वधियल
हाण शायद उहे
पाठकनि खे ई त मिलणा आहिन!
