भारत की संस्कृति के लिए... भाषा की उन्नति के लिए... साहित्य के प्रसार के लिए
धरतीको नापजोख/ मनप्रसाद सुब्बा
Kavita Kosh से
Sirjanbindu (चर्चा | योगदान) द्वारा परिवर्तित 09:06, 16 मार्च 2017 का अवतरण
धरतीको खास उँचाइ कति छ
यो कुरो
पर्वतारोहीको ब्यारोमिटर/अल्टिमिटरलाई होइन
तर अग्लो रुखको टुप्पोसम्म चढेर
हाँगाबिँगा छाँस्ने त्यो गोठालोलाई थाह छ
या त घरको धुरीमा चढेर
चुहुने छानो टाल्ने त्यो हिमालधोजलाई थाह छ ।
पृथ्वीको गोलाइ कति होला
यो कुरो त्यै हिमालधोजकी स्वास्नीलाई थाह छ
जसलाई छोराको आशामा फेरि चौंथो पटक
विशाल पेट बोक्न कर लगाइएकोछ ।
धरतीको ओजन चैं कति छ?
यो कुरो जान्नु हो भने
लत्रिएको टाउको थामिरहेको
कुनै हत्केलालाई हेरे हुन्छ ।
