सांची तो आ है / जितेन्द्र सोनी

बगत
मुट्ठी में पक्योड़ी रेत री तर्यां
तिसळज्यै
अर म्हूं हर गेड़ै
करल्यूं खुद सूं नवो वायदो

जिनगाणी केई बार तस्सली
अर कई बार गलतफहमी सूं
राजी होज्यै

सांची तो आ है
म्हैं पकड़्यो बगत नैं
कदैई कंवळै अर कदैई सख्त हाथां सूं

पण ओ मिल्यो हमेस ई
गरीब री झूंपड़ी
मजदूर रै पसीनै
का फुटपाथ माथै
फकीरी मांय गुणगुणावतै मिनखां रै मन

म्हूं डूबणों चाऊं
इणरै दरसण मांय।