देखॅ
है वहेॅ जग्घॅ छेकै
जेकरा हम्मंे
कहियो भूलेॅ नै पारेॅ छी
हौ बैसाखॅ रॅ ठहाका ईंजोरिया
आरो हौ ईंजोयिा में
पछिया हवा रॅ गुदगुदी से भरलॅ मजाक
तोरा केनाकेॅ विश्वास दिलैय्यौं
कि आय सब फीका लागै छै
फीका लागै छै
जिनगी केॅ एक लहास समझी केॅ ढोना।
अफसोस कि तोहें साथें नै छॅ
होना केॅ तोहरॅ साथ रहना
हमरॅ जिनगी के
पहलॅ आरो आखिरी अरमान छेलै
तोहरा शायद याद नै होतौं
कि हौ आमॅ के गाछ
जहाँ तोहें आपनॅ सखी रॅ साथ
अट्ठागोटी खेलै छेली
आय कतेॅ उदास लागै छै
लागै छै
तोरा गेला के बाद
यहाँ से सब कुछ विदा होय गेलै
बची गेलॅ छै खाली
तोरॅ याद
आरो यादॅ के बीहूड़ बनॅ में
हमरॅ जिनगी के
भटकलॅ होलॅ किस्सा