धरती धान किसान / अरुण हरलीवाल

• हिन्दी/उर्दू
• अंगिका
• अवधी
• गुजराती
• नेपाली
• भोजपुरी
• मैथिली
• राजस्थानी
• हरियाणवी
• अन्य भाषाएँ

अरुण हरलीवाल » कहाँ गेल गाँव »

Script

• Devanagari
• Roman
• Gujarati
• Gurmukhi
• Bangla
• Diacritic Roman
• IPA

सुन, रे भइया बदरा!

नइँ पानी हे, नइँ कादो हे,
ठनठन ई सावन-भादो हे।
धरती-धान-किसान सभे रे,
टुकुर-टुकुर अस्मान तके रे!
जमाखोर सब मउज मनइतन,
छोटजना पर खतरा।

करनी कुछ नइँ, छूछ देखावा,
जइसे ढोंगी साधू बाबा।
गरजऽ हें तूँ झूठ-मूठ के,
मलकऽ हें तूँ झूठ-मूठ के।
धनखेती सब मरे पियासल,
खूखा अहरा-पोखरा।

भाय छोटका दिल्ली धइलक,
आठ कमयलक, साठ गँवइलक।
बरिस दिना पर आवऽ हे ऊ,
उल्टे आँख देखावऽ हे ऊ।
बेच-खोचके फूँके खातिर
माँगऽ हे ऊ बखरा।

दम्मा से बेदम हे दादी,
माथा पर बहिनी के सादी।
रोज महाजन पइसा माँगे,
मुँहजुबानी इज्जत धाँगे।
कउँची खाएब, कउँची पीअब,
आउ देब का ओकरा।