भारत की संस्कृति के लिए... भाषा की उन्नति के लिए... साहित्य के प्रसार के लिए
जगमग चान / सतीश मिश्रा
Kavita Kosh से
Sharda suman (चर्चा | योगदान) द्वारा परिवर्तित 11:19, 7 मार्च 2019 का अवतरण ('{{KKGlobal}} {{KKRachna |रचनाकार=सतीश मिश्रा |अनुवादक= |संग्रह=दुभ...' के साथ नया पृष्ठ बनाया)
जगमग चान शरद-पुनिआँ के-
जइसे जमल बरफ बगबग हे,
जइसे रूई धुनल धुनिआँ के।
जगमग चान शरद-पुनिआँ के।
नील गगन आउ चन्दा कइसन
मान सरोवर, हंसा जइसन
या फिर नील ओहार चीर के
हुलकित कोई रम्भा अइसन
उठल मुठान पहिल कनिआँ के-
जगमग चान शरद पुनिआँ के।
रसगर कोई गीत निअन हे
पहिला-पहिला जीत निअन हे
अधरतिआ के सूनसान में
सेजिआ पसरल प्रीत निअन हे
रति-मुस्कान मदन-धनिआँ के-
जगमग चान शरद पुनिआँ के।
ताजमहल उपरे अउँधावल
या गंगा के फेन जमावल
या फिर गोर-गोर अंगुरी से
संगमरमर पर दूध गिरावल
जीवन-दान-कलस दुनिआँ के-
जगमग चान शरद पुनिआँ के।
