सूखि गवा है सावन दउआ / बोली बानी / जगदीश पीयूष

सूखि गवा है सावन दउआ
फिरि
बरखा के दिन आये हैं
आँखिन माँ सैलाब भरा है
पाहुन
जस दुरदिन आये हैं

जरै जेठु सावन-भादौं मा
छिपै पेटु-पीठी आँतन मा
खुसबू माटी केरि न महकी
कस
बरखा के दिन आये हैं

सपनु हुइ गये ताल-तलैया
झाँखर हुइ गे दादा भैया
नेहु सूखिगा सब आँखिन का
अस
बरखा के दिन आये हैं

फिल्मी रागु सुनावै भैया
पहर-पहर गरियावै मैया
जस करजी-मल्हार सब गावैं
तस
बरखा के दिन आये हैं