जलप / गीता त्रिपाठी

• हिन्दी/उर्दू
• अंगिका
• अवधी
• गुजराती
• नेपाली
• भोजपुरी
• मैथिली
• राजस्थानी
• हरियाणवी
• अन्य भाषाएँ

गीता त्रिपाठी » नृशंस पर्खालहरू »

Script

• Devanagari
• Roman
• Gujarati
• Gurmukhi
• Bangla
• Diacritic Roman
• IPA

सारङ्गीमा मुटु रेटिने
कैयन् प्रिय वियोग छन्
त्यो ढोकाभित्र
जसलाई सम्झेर
हृदयमा
करुण लहरहरू उठिरहनेछन्
 
अबफेरि गाइनेहरूले
दाउनेछैनन् केनैदिन
संघारबाट उभिएर
त्यो ढोकाको वीरगाथा
 
शताब्दीयौँको कालरात्रिमा
अजङ्गको त्यो ढोकाभित्र
कैयन् मृत्यु-उत्सवहरू मनाइए
अन्धवेगको वीरपूजनमा
कैयन् ताण्डव रातहरू रचाइए
 
जीवनका आशाहरू लहराउने
त्यस्तो कुन मीठो सङ्गीत गुञ्जियो र !
त्यो ढोकाभित्र
जसलाई सुनेर सृष्टिमा
नयाँ फूलहरू फक्रन सकून्
 
अबफेरि नगर्चीहरूले
आफ्नै छाती उधारेर
बजाउने छैनन्
साइतको कुनै दिन
त्यो ढोकाभित्रका
अतिरञ्जित धूनहरू
 
रात छिप्पिनुपहिल्यै
खोलिदिएको भए
ढोका
आज आफ्नै घर
यत्ति विरानो हुने थिएन ।