भारत की संस्कृति के लिए... भाषा की उन्नति के लिए... साहित्य के प्रसार के लिए
एकदिन मान्छे आफ्नै घर आइपुग्नेछ / मौन आवाज
Kavita Kosh से
Sirjanbindu (चर्चा | योगदान) द्वारा परिवर्तित 10:59, 12 सितम्बर 2024 का अवतरण ('{{KKGlobal}} {{KKRachna |रचनाकार=मौन आवाज |अनुवादक= |संग्रह= }} {{KKCatKavita}}...' के साथ नया पृष्ठ बनाया)
जसरी
तीव्र गतिमा समय फर्केर
उही समयमा आइपुग्नेछ !
ध्वनि फर्केर जसरी
उही मौनतामा आइपुग्नेछ !
जसरी
अस्ताएको घाम फर्केर
उही दिशामा आइपुग्नेछ !
जसरी
बतास फर्केर
उही ध्यानमग्न गुफामा आइपुग्नेछ !
जसरी
दुर्गम क्षितिजको एक चोक्टा आकाश
समीप आइपुग्नेछ !
जसरी
निर्वासित चरा फर्केर
उही गुँडमा आइपुग्नेछ !
जसरी
बगेर गएको आदिम नदी फर्केर
उही प्राचीन पहाडमा आइपुग्नेछ !
जसरी
विघटित यात्राबाट फर्केर बाटो
उही बाटोमा आइपुग्नेछ !
ठीक त्यसरी नै -
पटक पटक आफैँबाट चोइटिएर गएको
आफैँबाट खण्डित भएर गएको
आफैँबाट टाढिएर गएको
एउटा सनातन मान्छे
फर्केर फेरि आफ्नै घर आइपुग्नेछ !
- स्मृतिको छायाँ पछ्याउँदै पछ्याउँदै
एकदिन मान्छे आफ्नै घर आइपुग्नेछ !
०००
