भारत की संस्कृति के लिए... भाषा की उन्नति के लिए... साहित्य के प्रसार के लिए
बदल गया हरयाणा / दिनेश शर्मा
Kavita Kosh से
सशुल्क योगदानकर्ता ५ (चर्चा | योगदान) द्वारा परिवर्तित 19:43, 25 जनवरी 2025 का अवतरण ('{{KKGlobal}} {{KKRachna |रचनाकार=दिनेश शर्मा |अनुवादक= |संग्रह= }} {{KKCat...' के साथ नया पृष्ठ बनाया)
दादा दादी का
तड़के बख्ते उठ कै
न्हाणा धोणा
बालकां नै उठाणा
राम का ना लेणा
दादे का
सारे बड़े छोट्या नै
काके ताऊ अर बाबू तै
दनभर के काम समझाणा
मां ताई काकी का
चून पीसणा
धार काढणा दूध बिलौणा
दादी की निगरानी मै
सारे काम निपटाणा
थारे याद सै अक ना
यें सारी बात
जिनतै होवै थी
संस्कारां की शुरुवात
इब सूरज लिकडै पाछै उठणा
चा का कप पी कै
बिस्तर छोडणा
खा पीकै न्हाणा
दिनभर के काम निपटाणा
सारी बातां पाछै
दादी दादी के
कमरे मैं जाणा
अक उनका उठ कै आणा
इस्सा लाग्गै जणूं
संस्कारां का
कमजोर पडया ताना-बाणा
देख सोच कै लगा हिसाब
कितना बदल गया हरयाणा।
