भारत की संस्कृति के लिए... भाषा की उन्नति के लिए... साहित्य के प्रसार के लिए
गीतां री दीठ !/ कन्हैया लाल सेठिया
Kavita Kosh से
आशिष पुरोहित (चर्चा | योगदान) द्वारा परिवर्तित 14:59, 24 नवम्बर 2010 का अवतरण (नया पृष्ठ: {{KKGlobal}} {{KKRachna |रचनाकार=कन्हैया लाल सेठिया |संग्रह=लीलटांस / कन्हैया ल…)
हाल ओळखूं हूँ
पीड़ रो उणियारो
कोनी पड़ी मोटी
म्हारै गीतां री दीठ
हाल है सबदां री
चिमठी में साच
मती अपड़ा मनैं
कलम री ठौड़ डांगडी,
ओज्यूं साव काचो है
थारो ‘भोग्योड़ो जथारथ’
थाळी‘र माचो है
खाली उपलबधि,
जिनगानी कोनी रखेल
ओ मोटो तथ
भूलगी सुवाद र लारै हू‘र
थारी अधभोळी सिंग्या
थरप्या हा घणी चिंतणां स्यूं बडेरा
मिनखाचारै रा सासता मोल
तूं कर नुंईं सिरजणां
मांड मजल रै मारग में
कुंआरा खोज,
कोई क्यूं करसी अखेज ?
पण मती काट
सिरै नांव रा नादीदा
सळू सटै दूजती भैंस !
