भारत की संस्कृति के लिए... भाषा की उन्नति के लिए... साहित्य के प्रसार के लिए
ई वैतरणी के गाय नै छीकै / विजेता मुद्गलपुरी
Kavita Kosh से
वाद, पंथ आरो कोनो महापुरुष के नाम
वैतरणी के गाय नै छीकै
जे गलती करै छो
जनता के लूटै छो
भुख्खल बाघ सन टूटै छो
कोय अगर पकरै छो
कानून के फंदा में जकरै छो
तब तोरो जवाब खूब सुतरै छो
वाद, पंथ या कोय महापुरुष के नाम ले के
वैतरणी पार उतरै छो
ई वैतरणी के गाय नै छीकै
जिनकर नीति के लोग
जीवन में लाबै छै
जिनकर यश के लोग
घर-घर में गाबै छै
तौं ऊ नाम के कोन दशा कैने छो?
उनका तों गाय वैतरणी के बनैने छो?
ई वैतरणी के गाय नै छीकै
जानै छो?
कल आबै वाला पीठी की करतै?
नफरत, तिरस्कार
तोरो से,
ऊ वाद, पंथ आरो महापुरुष के नामों सें
ई के लेली,
हे हो भाय
अपनी रथ में
अपने नाम के चक्का जोतो
वाद, पंथ आरो कोनो महापुरुष के नाम में
कालिख नै पोतो
ई वैतरणी के गाय नै छीकै
ई वैतरणी के गाय नै छीकै
ई वैतरणी के गाय नै छीकै
