ठाढ़े हैं लषन कमलकर जोरे।/ तुलसीदास

(11)

ठाढ़े हैं लषन कमलकर जोरे |

उर धकधकी, न कहत कछु सकुचनि, प्रभु परिहरत सबनि तृन तोरे ||

कृपासिन्धु अवलोकि बन्धु तन, प्रान-कृपान बीर-सी छोरे |

तात बिदा माँगिए मातुसों, बनिहै बात उपाइ न औरे ||

जाइ चरन गहि आयसु जाँची, जननि कहत बहुभाँति निहोरे |

सिय-रघुबर-सेवा सुचि ह्वैहौ तौ जानिहौं, सही सुत मोरे ||

कीजहु इहै बिचार निरन्तर, राम समीप सुकृत नहिं थोरे |

तुलसी सुनि सिष चले चकित-चित उड्यो मानो बिहग बधिक भए भोरे ||