भारत की संस्कृति के लिए... भाषा की उन्नति के लिए... साहित्य के प्रसार के लिए
बग्दा थाकेँ भन्नु हुन्न नदी भएपछि / मञ्जुल
Kavita Kosh से
नदी
बग्दा थाकेँ भन्नु हुन्न नदी भएपछि
उठ्दा थाकेँ भन्नु हुन्न पहाड भएपछि
आफ्नो धर्म थामेकैले इन्द्रेणी भो राम्रो
ओइले पनि फूलझैँ फुल्ने जिन्दगी हो हाम्रो
पहराको छाँगाबाट खस्दा रोइनँ म
ढुङ्गामाथि बजि्रएर टुट्दा रोइनँ म
भूमरीमा परी घुम्दा बिचेत भइनँ म
हुन्न नदी भनी बाटो मोडी गइनँ म
भँगालो भै कहिले फाटेँ छाती चिरिनाले
भौँडी-भौँडी कुदेँ कैले बाटो बिरिनाले
तर पनि सागर पुग्ने लक्ष्य बोकिरहेँ
तिमीसँग मेरो आत्मा सधैँ जोडिरहेँ ।
