भारत की संस्कृति के लिए... भाषा की उन्नति के लिए... साहित्य के प्रसार के लिए
भटकलोॅ चिड़िया / अवधेश कुमार जायसवाल
Kavita Kosh से
राह भटकलोॅ चिड़िया बैठलोॅ एक ठूंठ केॅ डार
ताकै छै उल्टी-उल्टी केॅ कब ऐतै उजियार।
घना अंधेरा, हाथ नै सूझै, करिया छै आकाश
जो रे सूरज, भेलें कलमूहाँ, करलें सत्यानाश।
कन्नें हमरोॅ खोता न्यारा, कोंन दिशा में पेड़
कोंन दिशा में कास केॅ जंगल, कन्नें गेलै मेड़।
दोसर चूजा पेट भरै छै, हमरोॅ चूजा भुखलोॅ
ठरोॅ सें कांपै होतै बचबा, हे देवा की करल्होॅ।
मेघ घिरलोॅ छै, नै चंदा के, नै तारा के आस
बस एक जुगनू के आसा छै, विह्वल ताकौं आस।
