भारत की संस्कृति के लिए... भाषा की उन्नति के लिए... साहित्य के प्रसार के लिए
सिसकऽ हई खेतवा बधार / जयराम दरवेशपुरी
Kavita Kosh से
सावन मासे बरसइ मोर अँखिया
धरती धुरिया उड़ान रे
विपत के बोझवा से चंतलइ किसनमां
आफत में पड़ि गेलइ जान रे
धरती पियासल मुँह फार ताकइ
बदरो निठुर भेलइ आज रे
ऊपरा में रजवा इनर संग बरूणो भी
बचबइ नऽ हाय मोर लाज रे
घरो के अनजवा खेतवा में जरलइ
होई गेलइ कोठिया बेअनाज रे
लगन लिखाल मोर बेसाहल खेतवा के
गीतहारी ठोकइ कपार रे
झुरकल हरियर चुह-चुह मंगिया कि
जरल जाहइ सोलहो सिंगार रे
टेढ़की नजरिया से ताकऽ हइ गगनमा कि
सिसकऽ हई खेतिया बधार रे
एक तऽ अदखा ई अँखिया न खोललक
मग्धा नियन सुनसान रे
एकरो घघवा गगनमां में अंटकल
अकबक में हइ परान रे
लगऽ हइ झगड़ऽ गेलइ इनर वरूणा
धकवा में चउपट किसान रे।
