उत्तर धाम / जतरा चारू धाम / सुरेन्द्र झा ‘सुमन’

• हिन्दी/उर्दू
• अंगिका
• अवधी
• गुजराती
• नेपाली
• भोजपुरी
• मैथिली
• राजस्थानी
• हरियाणवी
• अन्य भाषाएँ

सुरेन्द्र झा ‘सुमन’ » जतरा चारू धाम»

Script

• Devanagari
• Roman
• Gujarati
• Gurmukhi
• Bangla
• Diacritic Roman
• IPA

ततय पथिक! किछु काल बिलमि वंकिम पथ विन्ध्य अखड
उन्मुख चौदिस परिक्रमण कय चलब उत्तरा खड।।36।।

बिच बिच गुर्जर सिन्धु कच्छ सौवीर पंचनद प्रान्त
राजस्थान प्रभृति जन जनपद पद-पद चलि अभ्रान्त।।37।।

संग्रामी बलिदानी बीरक गढ़-गढ़ीक पढ़ि वृत्त
अपन देश - गौरव गुण-गाथा सुनि मन करब पवित्र।।38।।

गुर्जर महाराष्ट्र सौराष्ट्र विदर्भ आन्ध्र सन्दर्भ
अवधक अवधि वत्स कौशल कनडेरियहु तकइत वर्ग।।39।।

मण्डल - मण्डित देश अखण्ड भरत - खण्डक दिक्पाल
बदरी-केदारक यात्रा अहँ करब पथिक नतभाल।।40।।

पूजि हिमाद्रि अवस्थित वैष्णव, कुंकुम रंजित वेश
गंगा डुब दय, मानस रस लय, प्रविशब नगपति देश।।41।।

पुनि बदरी-केदारक दर्शन जनम न दोसर योनि
उत्तर आश्रम गमन-श्रमक अछि उचित मुक्तिहिक बोनि।।42।।

श्रीबदरी-केदार पुजब हरि हर, पूरब मन काम
ज्योतिर्मय जोशीमठ दर्शन करइत ललित ललाम।।43।।